Падпісаны пратакол аб супрацоўніцтве ў галіне адукацыйнай і навуковай дзейнасці паміж Магілёўскім інстытутам МУС і Пекінскім каледжам народнай паліцыі.

Цырымонія прайшла падчас візіту ў Рэспубліку Беларусь прадстаўнікоў галоўнага ўпраўлення грамадскай бяспекі Пекіна. Упаўнаважаным прадстаўніком Пекінскага паліцэйскага каледжа выступіў містэр Ван І, намеснік генеральнага начальніка аддзела па палітычных пытаннях Пекінскага муніцыпальнага бюро грамадскай бяспекі. Прадстаўнік Кітая ў знак сяброўства і супрацоўніцтва паміж навучальнымі ўстановамі ўручыў сімвалічны падарунак – ключы ад Пекінскага паліцэйскага каледжа. Падпісанне пратакола адкрывае новыя гарызонты для развіцця супрацоўніцтва паміж навучальнымі ўстановамі па пытаннях падрыхтоўкі высокакваліфікаваных спецыялістаў для праваахоўных органаў.

Даведачна:
Пекінскі паліцэйскі каледж – гэта штатны каледж пры Бюро грамадскай бяспекі Пекіна з больш чым 60-гадовай гісторыяй. З 2004 г. каледж пачаў навучанне па праграмах бакалаўрыяту.

Чатырохгадовыя праграмы каледжа распрацаваны на аснове практычнай работы пекінскай паліцыі. Зараз у каледжы рэалізуюцца шэсць напрамкаў падрыхтоўкі: крымінальны вышук, крыміналістыка, грамадская бяспека, міжнародная дзейнасць паліцыі, кіраванне паліцэйскімі кадрамі і забеспячэнне бяспекі дарожнага руху.

Каледж размешчаны ў маляўнічай зоне Гюю горада Нанькоў раёна Чанпін. Каледж мае шырокую вучэбную базу і прапануе сучасныя метады навучання: першакласныя лабараторыі ДНК-тэсціравання, аналізу інфармацыі, параўнанне слядоў і крыміналістычнай фатаграфіі, сучасныя спартыўныя залы для трэніроўкі паліцэйскіх навыкаў і тактыкі, бібліятэкі, што дазваляе праводзіць сітуацыйнае і дыстанцыйнае навучанне. Каледж актыўна ўдзельнічае ў акадэмічных абменах з паліцэйскімі ведамствамі іншых краін.

Кіраўніцтва каледжа актыўна садзейнічае адукацыі для ўсебаковага развіцця і прыкладае вялікія намаганні для выхавання паліцэйскіх кадраў высокай кваліфікацыі, з трывалай прафесійнай асновай, добрай фізічнай падрыхтоўкай, шырокімі спецыяльнымі ведамі. На дадзены момант каля 40 тысяч выпускнікоў каледжа былі размеркаваны ў дзяржаўныя органы розных узроўняў. Сярод іх ёсць і героі Кітая, і кіраўнікі Пекінскага муніцыпальнага бюро грамадскай бяспекі. Таму Пекінскі паліцэйскі каледж называюць "калыскай сталічнай паліцыі".