1. Skip to Menu
  2. Skip to Content
  3. Skip to Footer

Аб інстытуце


Гісторыя навучальнай установы пачалася ў цяжкі пасляваенны час, калі гарады Беларусі яшчэ ляжалі ў руінах, і салдатам, якія прыйшлі з вайны, прыйшлося аднаўляць разбураную народную гаспадарку.
Краіна мела патрэбу ў кадравых супрацоўніках транспартнай міліцыі, і ўжо ў 1948 годзе востра паўстала пытанне аб неабходнасці адкрыцця навучальнай установы па падрыхтоўцы міліцыянераў-транспартнікаў, бо за час Вялікай Айчыннай вайны на яе франтах загінула больш за палову супрацоўнікаў дадзеных падраздзяленняў МУС.

2 красавіка 1948 года па загадзе Міністра дзяржаўнай бяспекі СССР генерал-палкоўніка Абакумава была заснавана Магілёўская школа перападрыхтоўкі сяржанцкага складу корпусу галоўнага ўпраўлення аховы на чыгуначным і водным транспарце з тэрмінам навучання 7 месяцаў. Першым начальнікам школы быў прызначаны Ляхаў Васіль Іванавіч.

31 студзеня 1949 года адбыўся першы выпуск 280 кадравых супрацоўнікаў. Усе курсанты былі былымі франтавікамі, многія з іх былі ўзнагароджаны ардэнамі і медалямі, сярод курсантаў-выпускнікоў вучылася два Героі Савецкага Саюзу.

У 1949-1950 гадах мірныя навучальныя заняткі сталі перарывацца з-за актывізацыі банд у навакольных лясах. Афіцэры і курсанты школы дапамагалі ліквідацыі бандыцкіх фарміраванняў у Магілёўскім, Чавускім, Шклоўскім і Бялыніцкім раёнах. Таксама курсанты школы прыцягваліся да аховы грамадскага парадку ў горадзе.
З 20 студзеня 1951 года ў сценах навучальнай установы праходзілі падрыхтоўку і перападрыхтоўку афіцэрскі склад корпусу і дывізіі Галоўнага ўпраўлення аховы Міністэрства дзяржаўнай бяспекі на транспарце.

У 1952 годзе пастаянны і пераменны склад школы быў задзейнічаны на ахове грамадскага парадку ў перыяд святкавання дня авіяцыі ў Тушына, дзе якім прысутнічала вышэйшае кіраўніцтва краіны на чале з І.В. Сталіным.

2 жніўня 1952 года Пастановай Савета Міністраў СССР школа была ператворана ў навучальную ўстанову па падрыхтоўцы аператыўнага складу для органаў транспартнай міліцыі з двухгадовы тэрмінам навучання. Трэба сказаць, што на той момант гэта была адзіная навучальная ўстанова такога профілю. Менавіта ў гэты перыяд існавання школы ў ёй навучаліся прадстаўнікі ўсіх куткоў Савецкага Саюзу, якія ў розныя гады вучобы прадстаўлялі каля 30 розных нацыянальнасцеў.

У перыяд з 1952 па 1954 гады пры непасрэдным удзеле курсантаў школы на ўскрайку Магілёва быў створаны мемарыял байцам батальёна капітана Уладзімірава, якія загінулі ў баях з фашыстамі. Кіраваў у той час школай Аляксей Іванавіч Карташоў.

Пры новым начальніку школы Бурчанкове Іване Паўлавічы школа зноў перажывае рэарганізацыю. У 1955 годзе яна была ператворана ў спецыяльную сярэднюю школу міліцыі і распачала падрыхтоўку аператыўных і следчых работнікаў з сярэдняй юрыдычнай адукацыяй. І зноў супрацоўнікам і курсантам школы кіраўніцтва краінай давярае самыя адказныя заданні. У 1957 годзе афіцэры і курсанты школы забяспечвалі ахову грамадскага парадку ў Маскве падчас правядзення VI Сусветнага фестывалю моладзі. Па выніках нясення службы многія супрацоўнікі і курсанты школы былі ўзнагароджаны: траім з іх былі ўручаны першыя знакі "Выдатнік міліцыі", звыш за 30 чалавек атрымалі граматы МУС СССР і ЦК ВЛКСМ.

У 1958 годзе ў школе была адкрыта Дошка Гонару, на якую сталі занасіць прозвішчы тых курсантаў, якія не толькі паспяхова завяршалі навучанне, але і прымалі актыўны ўдзел у грамадскім жыцці школы. Сёння на Дошку Пашаны занесены прозвішчы 112 курсантаў.

З нагоды 45-гадовай гадавіны Савецкай міліцыі 28 снежня 1962 года ад імя Прэзідыўма Вярхоўнага Савету БССР школе быў ўручаны Чырвоны Сцяг, які прыняў у свае рукі тагачасны кіраўнік школы Іван Міхайлавіч Аксёнаў.

У 1967 годзе да 50-годдзя Вялікай Кастрычніцкай сацыялістычнай рэвалюцыі школе была ўручана ганаровая грамата Магілёўскага абкама партыі і абласнога выканаўчага камітэта. У 1970 годзе курсанты школы прыцягваліся для аховы грамадскага парадку ў дні святкавання 100-годдзя з дня нараджэння У.І. Леніна, у Маскве, Ленінградзе, Ульянаўску. У 1973 годзе супрацоўнікі і курсанты школы прымалі ўдзел у выкананні спецыяльных заданняў МУС СССР у Казахскай, Узбекскай і Туркменскай СССР.

У 1972 школе была ўручана Ганаровая грамата Вярхоўнага Савета БССР. У 1980 годзе прадстаўнікі школы прымалі ўдзел у ахове грамадскага парадку падчас правядзення XXII Алімпійскіх гульняў у Маскве. За час аховы правапарадку супрацоўнікамі і курсантамі школы было выкрыта больш за паўтары тысячы правапарушэнняў.

У 1985 годзе перад супрацоўнікамі і курсантамі школы была пастаўлена новая задача – забеспячэнне грамадскага парадку падчас правядзення XII Сусветнага фестывалю моладзі і студэнтаў, а таксама Гульняў Добрай Волі ў Маскве. На Гульнях Добрай Волі ў 1989 годзе ў Сіэтле (ЗША) курсант школы Аляксандр Баніна стаў чэмпіёнам па боксе.

У 1975 годзе начальнікам школы быў прызначаны Васіль Іванавіч Спадабаеў. Дзякуючы яго энергіі была праведзена рэканструкцыя школы, пабудаваны новыя карпусы, былі заменены састарэлыя сродкі навучання, стабілізаваўся педагагічны калектыў, ажывіўся навучальны працэс і пазавучэбная праца.

У 1986 годзе супрацоўнікі і курсанты школы прымалі непасрэдны ўдзел у мерапрыемствах па ахове грамадскага парадку ў зоне ліквідацыі наступстваў аварыі на Чарнобыльскай АЭС. За добрасумленнае выкананне службовых абавязкаў падчас нясення службы ў зоне ліквідацыі наступстваў гэтай тэхнагеннай катастрофы шэраг супрацоўнікаў школы атрымалі дзяржаўныя узнагароды.

У перыяд з 1988 па 1989 год асабістаму складу школы прыйшлося з баявой зброяй у руках забяспечваць ахову грамадскага парадку ў зоне армяна-азербайджанскага ўзброенага канфлікту ў гарадах Горыс і Сісіян. На працягу 9 месяцаў афіцэры і курсанты неслі там сваю нялёгкую службу. 3 афіцэры былі ўзнагароджаны медалямі, больш за 20 курсантаў атрымалі нагрудныя знакі "Выдатнік міліцыі" і "За выдатную службу", многія былі ўзнагароджаны граматамі.

У 1990 годзе асабісты склад школы быў задзейнічаны ў мерапрыемствах па ахове грамадскага парадку падчас правядзення агульнаеўрапейскай канферэнцыі АБСЕ, а ў 1991 годзе выконваў спецыяльнае ўрадавае заданне ў Оршы.

У ліпені 1992 годзе школа была ператворана ў факультэт Акадэміі МУС Рэспублікі Беларусь, а ў 1994 годзе пастановай Савета Міністраў Рэспублікі Беларусь атрымала статус школы міліцыі МУС Рэспублікі Беларусь. У сувязі з пяцідзесяцігоддзем навучальнай установы ў 1998 годзе школа была ўзнагароджана Ганаровай граматай Савета Міністраў Рэспублікі Беларусь.
У адпаведнасці з пастановай Савета Міністраў Рэспублікі Беларусь ад 9 верасня 2002 года № 1232 Магілёўская школа міліцыі МУС Рэспублікі Беларусь была перайменавана ў Магілёўскі каледж МУС Рэспублікі Беларусь.

У адпаведнасці з Указам Прэзідэнта Рэспублікі Беларусь ад 8 ліпеня 2013 года № 307 Магілёўскі вышэйшы каледж МУС з 1 верасня 2014 года быў пераёменаваны ў Магілёўскі інстытут Міністэрства ўнутраных спраў Рэспублікі Беларусь.

За шэсць з паловай дзесяцігоддзяў змянілася не адно пакаленне супрацоўнікаў навучальнай установы, не раз змяняліся яе назва і структура, але нязменнай заставалася задача: падрыхтоўка і выхаванне высокакваліфікаваных спецыялістаў для органаў унутраных спраў.

У цяперашні час у навучальнай установе склаўся і працуе згуртаваны калектыў выкладчыкаў высокай кваліфікацыі, годных пераймальнікаў тых, хто стаяў ля вытокаў станаўлення і развіцця Магілёўскага інстытута Міністэрства ўнутраных спраў Рэспублікі Беларусь.